У рамках рэспубліканскай прафілактычнай акцыі «Бяспечныя канікулы» спецыяліст сектара прапаганды і ўзаемадзеяння з грамадскасцю Драгічынскага райаддзела па надзвычайных сітуацыях Вольга Нясцюк правяла пазнавальнае мерапрыемства для выхаванцаў аздараўленчага лагера «Зарніца». Галоўнай мэтай сустрэчы стала павышэнне ўзроўню ведаў школьнікаў у сферы бяспекі жыццядзейнасці.

Хлопчыкі і дзяўчынкі з энтузіязмам падзяліліся з работнікам МНС сваімі ведамі аб правілах паводзін у розных сітуацыях: ля вады, дома і падчас непагадзі. Сустрэча паказала, што дзеці добра дасведчаныя аб мерах засцярогі і гатовы прымяняць іх на практыцы.

Адным з самых запамінальных момантаў стала практычная трэніроўка па эвакуацыі з «палаючага памяшкання». Пад кіраўніцтвам Вольгі Нясцюк хлопцы адпрацавалі дакладны алгарытм дзеянняў пры пажары, навучыліся правільна паведамляць пра здарэнне ратавальнікам і выконваць парадак выхаду з будынка.

– Аказваецца, знакі эвакуацыі адыгрываюць важную ролю, ніколі пра гэта не задумваўся. Я ведаю кожны куток у сваёй школе, але мая мама, напрыклад, не. І куды ёй ісці ў выпадку пажару? Менавіта таму пажарныя паказальнікі – гэта добрыя памочнікі, – падзяліўся ўражаннямі адзін з удзельнікаў мерапрыемства Мацвей, падкрэсліўшы важнасць ведання шляхоў эвакуацыі для кожнага.

Для замацавання матэрыялу ратавальнікі арганізавалі віктарыну. У нязмушанай абстаноўцы і гульнявой форме дзеці паўтарылі важныя правілы і правялі час з карысцю.

Напрыканцы сустрэчы ўсім выхаванцам лагера ўручылі карысныя падарункі ад МНС. Яны дапамогуць дзецям замацаваць веды і зрабіць летнія канікулы не толькі вясёлымі, але і бяспечнымі