Як правільна выклікаць пажарных, што рабіць, калі памяшканне напоўнілася дымам, і па якіх нумарах тэлефанаваць у выпадку бяды? Адказы на гэтыя важныя пытанні вучні ДУА «Асоўская сярэдняя школа» даведаліся на незвычайным уроку бяспекі.

У гасцях у навучэнцаў пабывала старшы інспектар сектара прапаганды і ўзаемадзеяння з грамадскасцю Столінскага раённага аддзела па надзвычайных сітуацыях Алеся Вячорка. Мерапрыемства прайшло ў інтэрактыўным фармаце: школьнікаў чакалі захапляльныя гульні і практычныя заданні.

Перш за ўсё Алеся Вячорка разабрала з рабятамі алгарытм выкліку службы выратавання. Дзеці даведаліся, якую інфармацыю неабходна паведаміць дыспетчару ў першую чаргу. Каб замацаваць тэорыю, школьнікам далі магчымасць на практыцы «выклікаць» ратавальнікаў.

Далей удзельнікі мерапрыемства дэталёва разабралі розныя надзвычайныя сітуацыі, якія могуць здарыцца ў побыце ці на вуліцы. Разам з Алесяй Рыгораўнай школьнікі выбудоўвалі правільную мадэль паводзін: як не паддацца паніцы і якія крокі зрабіць, каб абараніць сябе і навакольных.

Асаблівую ўвагу ўдзялілі тэме пажару. Дзецi пазналі, чым небяспечны дым і як правільна пакідаць памяшканне, калі яно імкліва запаўняецца прадуктамі гарэння. Для замацавання матэрыялу была праведзена гульня «Эвакуацыя». Школьнікі адпрацоўвалі навыкі выхаду з «задымленага» класа.

Напрыканцы сустрэчы інспектар яшчэ раз нагадала вучням нумары экстранных службаў выратавання.

– Ведаць нумары 101 і 112 павінна кожнае дзіця з малых гадоў. Але не менш важна ўмець хутка і правільна прымяніць гэтыя веды на практыцы, не разгубіцца ў складанай сітуацыі, - адзначыла Алеся Вячорка.

МНС нагадвае: бяспека дзяцей – клопат дарослых! Рэгулярна паўтарайце правілы паводзін пры пажары і нумары тэлефонаў экстраных службаў.