У Маларыцкім раённым аддзеле па надзвычайных сітуацыях адбылася ўрачыстая цырымонія провадоў на заслужаны адпачынак старшага інструктара-пажарнага Дзмітрыя Шыманчыка.

На службу ў пажарную аварыйна-выратавальную частку №1 Маларыцкага раённага аддзела па надзвычайных сітуацыях Дзмітрый Шыманчык прыйшоў у маі 2003 года ў званні малодшага сяржанта. У званні старшага прапаршчыка Дзмітрый з 2024 года.

За 23 гады службы было мноства выклікаў, якія і злічыць немагчыма, але, на думку Дзмітрыя, кожны выезд – як першы раз.

– Самая запамінальная гісторыя за гады моёй службы –гэта калі ў 2012 пры пажары прыватнага дома ў г. Маларыта ўваход быў ахоплены агнём, у людзей не было магчымасці выйсці, а вокны былі забітыя плёнкай. Па прыезду мы эвакуіравалі праз акно сям'ю з трох чалавек. Самае галоўнае, што людзі не пацярпелі, – успамінае Дзмiтый.

Ва ўрачыстай абстаноўцы начальнік аддзела Сяргей Касянюк з душэўнай цеплынёй выказаў сваю ўдзячнасць Дзмітрыю за яго адданую і старанную працу.

– Дзмітрый Андрэевіч, Вы з'яўляецеся прафесіяналам сваёй справы і прыкладам для пераймання маладым. Сёння вы робіце крок у новае жыццё з новымі магчымасцямі, падзеямі і прыемнымі момантамі. Цяпер у Вас ёсць час азірнуцца назад на ўсе дасягненні, цяжкасці, узлёты і падзенні, якія вы пераадолелі. Ад усёй душы жадаем Вам здароўя, невычэрпнай энергіі, поспехаў ва ўсім, сямейнага цяпла, выканання ўсіх надзей і выдатных здзяйсненняў. Хай жыццёвая дарога падае толькі прыемныя неспадзеўкі, а поспех спадарожнічае заўсёды і ўсюды.

Провады на заслужаны адпачынак па традыцыі ратавальнікаў завяршыліся «воднай феерыяй» пад бурныя апладысменты калег і гукі пажарных сірэн.