У рамках першага этапу рэспубліканскай акцыі «Моладзь за бяспеку» старшы інспектар сектара прапаганды і ўзаемадзеяння з грамадскасцю Баранавіцкага гаррайаддзела па надзвычайных сітуацыях Сяргей Кулеш сумесна з актывістамі Беларускай маладзёжнай грамадскай арганізацыі выратавальнікаў-пажарных і Беларускага рэспубліканскага саюза моладзі ўстановы «Баранавіцкі дзяржаўны музычны каледж» наведалі пажылую пенсіянерку Людмілу Іосіфаўну.

Людміла Іосіфаўна пражывае адна, таму была вельмі рада дапамозе ад такой дружнай кампаніі. Хлопцы адразу прыступілі да працы. Спачатку папрацавалі на прыдамавой тэрыторыі, прыбралі кветкі і апалае лісце. Пасля адправіліся на прысядзібны ўчастак, дзе прывялі ў парадак градкі.

Не застаўся па-за ўвагай і пажарабяспечны стан домаўладання. Прадстаўнік МНС аказаў дапамогу ў абследаванні паддашкавага памяшкання дома, праверыў спраўнасць печы, электраправодкі і аўтаномных пажарных апавяшчальнікаў.

Пасля плённай працы хлопцы ўручылі Людміле Іосіфаўне наглядна-выяўленчую прадукцыю МНС і зрабілі фота на памяць.

За мінулы перыяд 2021 года на тэрыторыі Баранавіцкага рэгіёну зарэгістравана 79 пажараў, загінулі 12 чалавек.

У мэтах папярэджання пажараў у жыллі МНС нагадвае:

- не паліце ў ложку, не выкідвайце непатушаныя цыгарэты з вокнаў;

- сачыце за спраўнасцю электраправодкі, не перагружайце электрасетку, не дапушчайце прымянення самаробных электрапрыбораў;

- не пакідайце без нагляду ўключаныя ў сетку электрапрыборы;

- не распальвайце печы лёгкаўзгаральнымі і гаручымі вадкасцямі, не пакідайце іх без нагляду, калі распалілі;

- не пакідайце малалетніх дзяцей адных, навучыце іх правілам бяспекі.